Թրամփը հուսով է, որ Պուտինի հետ հանդիպումը կօգնի նվազեցնել լարվածությունը. Սպիտակ տուն

10:45   29 Հունիս 2018    301

ԱՄՆ նախագահ Դոնալդ Թրամփը հուսով է, որ իր ռուս գործընկեր Վլադիմիր Պուտինի հետ հանդիպումը կօգնի նվազեցնել լարվածությունը եւ կառուցողական փոխգործակցության կհանգեցնի, որը կբարելավի խաղաղությունն ու անվտանգությունն ամբողջ աշխարհում:

Hayatsk.info-ն հայտնում է, որ այս մասին հայտարարել է Սպիտակ տան ներկայացուցիչ Լինդսեյ Ուոլթերսը:

Պատասխանելով հարցին՝ հավատում է արդյո՞ք Թրամփը Պուտինին՝ նրա այն պնդման հետ կապված, որ Ռուսաստանը չի միջամտել ամերիկյան ընտրություններին, Ուոլթերսը նշել է, որ նախագահն իր կարծիքը հայտնել է այդ հարցի վերաբերյալ: «Նա (Թրամփը) կրկնել է, որ նախընտրական քարոզարշավին որեւէ միջամտություն չի եղել»:

Մեկնաբանելով հարցը՝ արդյո՞ք Թրամփը մտադիր է հանդիպման ընթացքում պահանջել, որպեսզի «Ռուսաստանը վերադարձնի Ղրիմը Ուկրաինային», Ուոլթերսը նշել է, որ մտադիր չէ կանխատեսել, թե ինչ է նախագահն ասելու Պուտինի հետ բանակցություններում: «Բայց ես կարող եմ ասել, որ նա այս հանդիպումն անցկացնում է Ամերիկայի ազգային անվտանգության շահերից ելնելով՝ հասկանալու համար, արդյոք Ռուսաստանը պատրաստ է առաջընթացի հասնել մեր հարաբերություններում »:

Hayatsk.info

Հեշթեգներ: Թրամփ   Պուտին  


Վերնագիրի այլ պիտակները