Ford Mustang-ի ստեղծողի պատմական Dodge Viper-ը աճուրդում կրկնակի գնով է վաճառվել

21:37   20 Հունվար 2020    475

Bonhams աճուրդային տանը վաճառել են Dodge Viper-ը, որը պատկանում է Ford-ի եւ Chrysler-ի հայտնի թոփ-մենեջեր Լի Յակոկային։

Մոտ 10 000 կիլոմետր քշած սուպերքարի համար ակնկալվում էր 125 000 դոլար ստանալ, սակայն անհայտ գնորդը պատմական մեքենայի համար 285 500 դոլար է վճարել, գրում է Motor-ը։

Dodge Viper-ի առաջին կոնցեպտը հանրությանը ցուցադրվել է Դեթրոյթի ավտոսրահում՝ 1989թ․, սակայն սպորտքարի թողարկման վերջնական որոշումն ընդունվել է միայն 1990թ․։ Dodge շարքում երկտեղ, բաց տանիքով եւ մթնոլորտային V10 շարժիչով մոդելի մասին հայտարարել է ինքը՝ Լի Յակոկան՝ Քերոլ Շելբիի հետ միասին, տեղեկացնում է Hayatsk.info-ն։

Dodge Viper նախագծի ոգեշնչող Լի Յակոկան սերիական առաջին սպորտքարը, որը գործարանից դուրս է եկել 1992թ․, ձեռք է բերել 001 համարով։ 406 ուժանոց, տասը ցիլինդրանոց շարժիչով կաբրիոլետը շատ էր տարբերվում Dodge-ի այն ժամանակվա մյուս մոդելներից։ Յակոկան խնամքով էր վերաբերվում մեքենային եւ այն հաճախ չէր վարում՝ քառորդ դարի ընթացքում ընդամենը 6 220 մղոն (10 010 կմ)։ Սպորտքարը նոր մեքենայի տեսք ունի՝ անթերի են պահպանվել եւ թափքը, եւ մեխանիկական մասը, եւ նույնիսկ անվադողերը։

Լի Յակոկան հայտնի է որպես ավտոմոբիլային ինդուստրիայի լավագույն թոփ-մենեջերներից մեկը, ինչպես նաեւ որպես կուլտային Ford Mustang-ի ստեղծող։ Ford ընկերությունից հեռանալուց հետո Յակոկային առաջարկել են Chrysler-ի ղեկավարի պաշտոնը։ Ընկերությունն այն ժամանակ գտնվում էր սնանկության եզրին։ Մասնագետին հաջողվել է կարգավորել Chrysler-ի ֆինանսական դրությունը եւ ժամկետից 7 տարի շուտ ԱՄՆ կառավարությանը վերադարձնել 1,2 մլրդ դոլարի վարկը։ Լի Յակոկան մահացել է 2019թ․ հուլիսի 2-ին, կյանքի 95-րդ տարում։

Hayatsk.info

Հեշթեգներ: Ford-Mustang  


Վերնագիրի այլ պիտակները