Բժիշկները լավ են հասկանում կորոնավիրուսից տառապողներին, չեն հասկանում վիրուսից չվախեցող անձանց

14:32   01 Հուլիս 2020    130

Կորոնավիրուսի համաճարակի դեմ առաջնային գծերում պայքարող բուժաշխատողները կարծում են, որ համաճարակը դեռեւս շատ երկար կշարունակվի:

Մերիլենդ նահանգի Ֆորթ Վաշինգտոնի բժշկական կենտրոնի շնչառական հարցերով թերապեւտ Քեւին Քոլը, որն ինքն է տառապում ասթմայով, ասում է, թե լավ է հասկանում կորոնավիրուսով վարակված այն անձանց վախը, որոնց մոտ ի հայտ են գալիս շնչելու դժվարություններ:

Սակայն նա չի հասկանում, թե ինչպես կարելի է նման պայմաններում նորից թույլատրել մարդկանց մեծ կուտակումներ:

«Ամեն օր ես տեսնում եմ այս վարակից մեռնող մարդկանց, եւ լողափերում մարդանց բազմությունը ինձ ստիպում է մտածել, որ մարդիկ լավ չեն մտածում»,-ասում է նա:

Այո, սահմանափակումները մեղմելու առաջին ու մեծ քայլերը կատարած 31 նահանգներում այսօր գրանցվում է կորոնավիրուսի տարածման արագության նկատելի աճ: Միայն կիրակի օրը, միայն Ֆլորիդա նահանգում գրանցվել է վարակի ավելի քան 8500 նոր դեպք եւ 29 մահացություն:

Եվ ինչպես նահանգապետ Ռոն ԴեՍանթիսն է ասում, «Եթե մարտ ամսին նոր հիվանդների միջին տարիքը 60 էր, ապրիլ-մայիսին` 50, ապա վերջին տասն օրերի ընթացքում վարակվածները 33-ից 36 տարեկան են»:

Բուժքույրերից Թրաքինա Հոգանն ասում է, թե միայն տեսնելով բուժանձնակազմի պաշտպանիչ հանդերձանքը, մարդիկ պիտի հասկանային, թե որքան վտանգավոր է այս վիրուսն ու արագ տարածվող:

«Սա սուտ չէ, այն իրական է ու կարող է հասնել յուրաքանչյուրին», ասում են նրանք ու հիշեցնում` «Կրե՛ք դիմակներ, ձեռքերը հաճախ լվացե՛ք: Որքան հնարավոր է, պահպանեք հեռավորություն: Դրանով իսկ հարգե՛ք մյուսներին»:

Hayatsk.info

Հեշթեգներ: Կորոնավիրուս  


Վերնագիրի այլ պիտակները