Մոսկվայում մասամբ մեղմացվել են համաճարակային սահմանափակումները

16:55   21 Հունվար 2021    131

Մոսկվայի քաղաքապետ Սերգեյ Սոբյանինը հայտարարել է կորոնավիրուսային համավարակով պայմանավորված առկա սահմանափակումները զգալիորեն մեղմացնելու մասին:

Վերոնշյալ հրամանագիրը կգործի հունվարի 22-ից, որի համաձայն քոլեջները, նախադպրոցական հաստատություններն ու մարզադպրոցները, ինչպես նաև երեխաների համար նախատեսված ժամանցի հաստատությունները վերադառնում են աշխատանքի բնականոն ռիթմին, իսկ համալսարաններում մինչև փետրվարի 6-ը երկարաձգվում է հեռավար ուսուցումը:

Թատրոններում, համերգասրահներում և կինոթատրոններում հանդիսատեսի առավելագույն քանակը բարձրացվել է մինչև 50 տոկոս, իսկ առևտրի կենտրոններում գործող մանկական ժամանցի սենյակների համար նշված սահմանափակումները վերացվել են:

Իրենց աշխատանքն են վերսկսում թանգարաններն ու գրադարանները, ինչպես նաև վերսկսում են մշակութային, ժամանցային և սպորտային միջոցառումները, որոնց մասնակիցների ընդհանուր թիվը չպետք է գերազանցի տարածքի տարողունակության 50 տոկոսը:

Սահմանափակումները շարունակում են գործել հասարակական սննդի կետերի, բարերի, ակումբների, դիսկոտեկների և նմանատիպ այլ հաստատությունների համար:

Քաղաքապետը հույս է հայտնել մայրաքաղաքում համաճարակաբանական իրավիճակի բարելավման վերաբերյալ և նշել, որ կարևոր է պատվաստումներին ակտիվ մասնակցությունն ու տրանսպորտում և հասարակական վայրերում դիմակի ռեժիմի պահպանումը:

Hayatsk.info

Հեշթեգներ: Մոսկվա  


Վերնագիրի այլ պիտակները

hayatsk.info ©2016 | Բոլոր իրավունքները պաշտպանված են