Կոնգրեսականը Բայդենին կոչ է արել բոյկոտել Պեկինում անցկացվելիք Օլիմպիական խաղերը

16:22   23 Փետրվար 2021    172

ԱՄՆ կոնգրեսական, հանրապետական կուսակցության ներկայացուցիչ Ջոն Կետկոն ԱՄՆ նախագահ Ջո Բայդենին կոչ է արել Չինաստանի կողմից ույղուրների դեմ կատարված գործողությունների պատճառով բոյկոտել Պեկինում 2022 թվականին անցկացվելիք Ձմեռային օլիմպիական խաղերը:

«Չինաստանի կոմունիստական կուսակցության կողմից ձեռնարկված գործողությունները հակասում են ինչպես ԱՄՆ-ի, այնպես էլ ամբողջ աշխարհում նրա դաշնակիցների արժեքներին: Բացահայտ ցեղասպանություն կատարող երկրում անցկացվող Օլիմպիական խաղերը ոչ միայն խարխլում են այդ ընդհանուր արժեքները, այլև ստվեր են գցում այն խոստումների վրա, որոնք տրվել են ազատ և արդար հասարակության ձգտող մարդկանց»,- ասվում է հաղորդագրության մեջ, տեղեկացնում է Hayatsk.info-ն:

Կետկոն Բայդենի վարչակազմին կոչ է արել ԱՄՆ դաշնակիցների հետ համատեղ միջոցներ ձեռնարկել՝ խաղերը Չինաստանից տեղափոխելու համար «մի երկիր, որն իսկապես ապրում է Օլիմպիական խարտիայի արժեքներին համապատասխան»:

Նամակի պատճեններն ուղարկվել են Միջազգային օլիմպիական կոմիտե (ՄՕԿ), ինչպես նաև ԱՄՆ ազգային անվտանգության հարցերով օգնական Ջեյք Սալիվանին, պետքարտուղար Էնթոնի Բլինկենին և ներքին անվտանգության նախարար Ալեխանդրո Մալյորկասին:

Հիշեցնենք՝ հունվարի 16-ին Կանադայի ընդդիմադիր պահպանողական կուսակցությունը իշխող Լիբերալ կուսակցությունից պահանջել էր ճնշում գործադրել ՄՕԿ-ի վրա՝ հետաձգելու խաղերը, որոնք պետք է անցկացվեն Պեկինում 2022 թ. փետրվարի 4-ից 20-ը՝ ույղուրների ենթադրյալ ցեղասպանության, ինչպես նաև Չինաստանի իշխանությունների կողմից Կանադայի քաղաքացիների կալանավորման պատճառով:

Hayatsk.info

Հեշթեգներ: Աշխարհ    


Վերնագիրի այլ պիտակները